د پژواک خدمتونه

د انځورونو څانګه

د ولس غږ کلتوري پروګرامونه

د ټاکنو خبري پوښښ

د کانونو په اړه ځانګړې پاڼه

Afghan Peace Process Special Page

د پژواک د سوداګريزو اعلانونو خدمتونه

Daily Newsletter

Language
Sending Time (GMT / Kabul time)

سرور دانش: افغان حکومت هېڅکله نه دي غوښتي د کړکېچ او ګواښ عامل واوسي

سرور دانش: افغان حکومت هېڅکله نه دي غوښتي د کړکېچ او ګواښ عامل واوسي

Nov 15, 2017 - 20:04

عشق اباد (پژواک،٢٤لړم٩٦): د افغانستان په اړه د سيمه ييزې ملګرتيا غونډه نن سهار د ترکمنستان په عشق اباد ښار کې پيل شو او ډېرى ګډونوالو د ريکا په چوکاټ کې د ټرانزيټ، ټرانسپورټ او سوداګرۍ، د مېرمنو توانمندولو او د سوداګرو او پانګوالو ترمنځ د ملګرتيا پر پياوړتيا ټينګار وکړ.

په دغه غونډه کې د سيمې او نړۍ هېوادونو له ٣٠ ډېر د بهرنيو چارو وزيرانو او د ٢٥سيمه ييزو او نړيوالو سازمانونو استازو ګډون کړى دى.

د ولسمشر دويم مرستيال سرور دانش په خپلو خبرو کې وويل، د ريکا په اومه غونډه کې له ٦٠ډېرو هېوادونو او نړيوالو سازمانونو د استازو شتون، له ګډو ننګونو سره د مقابلې لپاره د لاډېرې سيمه ييزې ملګرتيا د پياوړتيا او په سيمه کې له شته اقتصادي او سياسي موکو څخه د غوره کار اخيستنې په برخه کې ګډ مسووليت ته ستاسو د ژمنيا ښودنه کوي.

هغه زياته کړه، په څو تېرو کلونو کې د افغان حکومت يو مهم لومړيتوب، د سيمه ييزې اقتصادي ملګرتياوو پياوړتيا ده او په دې برخه کې په سيمه ييزه او لويې وچې په کچه د ټرانزيټ او سوداګرۍ د مرکز په توګه فعال رول لوبولو ته ژمن دى.

د نوموړي د معلوماتو له مخې، د ريکا چوکاټ په ٢٠٠٥ کال کې له خپل جوړښت سره هممهال توانېدلى چې د انرژۍ، ټرانسپورټ، سوداګرۍ، ټرانزيټ، مخابراتو او اړيکو، د خصوصي سکتور د پياوړتيا او کارګرو د استولو په شان مختلفو برخو کې د ملګرتيا او خبرو اترو لپاره يوه مناسبه زمينه رامنځ ته کړي.

دانش د لاجورد لارې د هوکړه ليک لاسليک ته په اشارې سره چې د ريکا غونډې په څنډه کې د پنځو غړو هېوادونو ترمنځ لاسليک کېږي، وويل چې دغه هوکړه ليک د ټرانسپورټ او ټرانزيټ به برخه کې د يوه ډېر مهم او اغېز لرونکي سند په توګه په سيمه ييزه کچه د افغان حکومت د ګډو هڅو يوه څرګنده بېلګه ده.

د ده په وينا، شک نشته چې د دغه مهم هوکړه ليک عملي کېدل به د اور-اسيا په حوزه او له افغانستان، ترکمنستان او له خزر سمندر څخه تر اروپا پورې د يوې منظمې او منسجمې ټرانزيټي او ټرانسپورټي شبکې له جوړولو سره مرسته وکړي او د سيمې او له سيمې ورهاخوا خلک به هغو له سترو اقتصادي اغېزمو څخه ګټه پورته کړي.

نوموړي د خپلو خبرو په دوام کې وويل، بايد د سيمه ييزې ملګرتيا او سازمانونو په چوکاټونو کې د سيمه ييزې هڅو او فعاليتونو ترمنځ همغږي ښه شي او شک نشته چې د ريکا چوکاټ په دې برخه کې رغنده رول لوبولاى شي.

سربېره پردې بايد د خصوصي سکتور ودې په ځانګړې توګه د ښځو اقتصادي پياوړتيا ته جدي پاملرنه وشي.

دانش وويل، افغانستان د سيمه ييزې همپالنې د مرکز او د مرکزي او سويلي اسيا  او منځني ختيځ د نښلوونکې څلورلارې په توګه د ګډې سيمه ييزې ليدتوکي د تحقق په لړ کې فعالې ونډې اخيستو ته چې د تلپاتې ټيکاو او هوساينې خونديتوب دى، کلک ژمن دى او د ريکا په چوکاټ کې د افغانستان چورليزي رول او دغه راز د اسيا د زړه پروسه د دغه ادعا تاييد دى.

هغه دغه راز وويل، د ټولو ملګرتياوو اصلي او بنسټيزه موخه، په سيمه کې دوو موخو ته رسېدل دي چې تلپاتې ټيکاو او امنيت خونديتوب، د بې وزلۍ کمېدل او د خلکو هوسياينه ده.

د ولسمشر دويم مرستيال دغه راز وويل، افغانستان خپل مهم سټراټيژيک او جيوپوليټيک موقعيت ته په پام سره يې، هم د سيمې د هېوادونو لپاره يوه موکه  کېداى شي او هم د بې ثباتۍ او کړکېچ  يو ګواښ او عامل کېداى شي.

هغه ټينګار وکړ چې افغان حکومت هېڅکله نه دي غوښتي چې د کړکېچ او ګواښ عامل و اوسي او هېڅکله به ونه غواړي چې د لرې او نږدې هېوادونو له پولو څخه وګواښل شي.

خو هغه وويل: "تمه لرو چې ټول سيمه ييز او ګاونډي هېوادونه افغانستان ته همداسې وګوري او د ښه او بد ترهګر ترمنځ له توپير  کولو پرته له ترهګرۍ سره په مبارزه او سولې او امنيت په رامنځ ته کولو کې مرسته وکړي."

د افغانستان د بهرنيو چارو سرپرست وزير صلاح الدين رباني هم په دغه نړيوال کنفرانس کې په خپلو خبرو کې وويل چې د سيمې هېوادونه په دا ډول غوره ميکانيزمونو سره په ښه توګه مخ ته تلاى شي او د خپلو ملګرتياوو کچه پياوړې کولاى شي.

رباني زياته کړه: "افغانستان په سيمه کې ټيکاو ته ډېره اړتيا لري او د ريکا د اومې غونډې جوړېدل دې غوښتنو ته مثبت ځواب ويلاى شي او موږ خپلې دندې په ښه توګه پرمخ بېولاى شو او د سيمه ييزې ملګرتيا د پياوړتيا په لړ کې ټينګ ګامونه پورته کولاى شو."

د ګورجستان د بهرنيو چارو وزير ميخاييل چانه ليت زده  Mikheil Janelidzeپه خپلو خبرو کې وويل چې هېواد يې د لاجوردو لارې بيا جوړېدو لپاره چمتووالى اعلانوي.

د هند د بهرنيو چارو وزيرې Mobashar Jawed Akbar وويل، د ريکا کنفرانس په سيمه کې د اقتصادي ملګرتياوو د خونديتوب په اړه د افغانستان او نورو هېوادونو ترمنځ د يوه ارتباطي پول په شان دى.

د هند د بهرنيو چارو وزيرې وويل، ښه دوستان د ستونزو په وخت کې پېژندل کېږي او زياته يې کړه، څوک چې د افغانستان په څنګ کې ولاړ دي، د دغه هېواد رښتيني دوستان دي.

نوموړې د ريکا اوم کنفرانس د سيمه ييزو ملګرتياوو د ودې لپاره يوه موکه وبلله او زياته يې کړه چې دغه ملګرتيا په افغانستان کې د امنيت د خونديتوب لامل ګرځي.

نوموړې د پاکستان له خوا د افغانستان او هند د سوداګريزو مالونو د لېږد لارې بندول د افغانستان د خلکو پرضد يو حرکت وباله.

د ايران د "مسکن" وزير عباس اخندي Abbas Ahundi چې په دغه کنفرانس کې يې د خپل هېواد په استازيتوب خبرې کولې، وويل چې د سيمه ييزې ملګرتيا په چوکاټ کې له ننګونو سره د مقابلې لپاره ښه موکه رامنځ ته کېږي.

هغه وويل، هېواد يې چمتو دى چې د افغانستان د اقتصادي غوړېدا لپاره مرسته وکړي.

د پاکستان د ملي امنيت سلاکار سرتاج عزيز په دغه کنفرانس کې د خپلو خبرو پرمهال وويل چې د دغه کنفرانس د ټولو ګډونوالو هېوادونو اصلي موخه په افغانستان کې سوله او ټيکاو راوستل دي.

نوموړي زياته کړه، هېواد يې د ريکا په چوکاټ کې له افغانستان سره د سوداګريزو اړيکو پياوړتيا ته ژمن دى.

سرتاج عزيز د هند او افغانستان د سوداګريزو مالونو پر لېږدولو د لارې د بندېدو په اړه د هند د بهرنيو چارو د وزيرې د خبرو په ځواب کې وويل چې هېواد يې له افغانستان سره د سوداګريزو اړيکو د پراخولو او سيمه ييزې اقتصادي ملګرتيا د پيا وړتيا په لړ کې ملګرتيا کوي.

د متحدو عربي اماراتو د بهرنيو چارو وزير انور محمد قرقش هم له افغانستان او د ريکا له غړو هېوادونو سره د سوداګريزې ملګرتيا د پيا وړتيا لپاره چمتووالى اعلان کړ.

د ريکا کنفرانس له ٢٠٠٥زېږديز کال څخه پيل شوى چې شپږ پخوانۍ ناستې يې په ترتيب سره په کابل، هند، اسلام اباد، استانبول او دوشنبې کې ترسره شوې دي.

ورته راپورونه:


Download “Pajhwok” mobile App, on your smartphone to read and access latest news, features, interviews, videos and photos about Afghanistan.

   

نظر ورکړئ

اعلانونه

Advertisement